North Garo Hills-ni nangrimgimin jolni NGO-rang jekai GSMC, AYWO, GSU aro AAYF dolrang Mendipathar Bajaro donggipa dokan ge∙sao dongimin somoina batgimin bosturangko palanina Mendipathar Police Station-o mokordoma ka·angaha. Ia dokan nokgipa Kadam Ali ong·a, jean Bamuni Panikhowa, Goalpara, Assam oni ong·a ine NGO dolrang aganangaha.
Ia dongimin somoina batgimin bosturangko palanichi manderangni be·en aro janggina namen kenchakbeani ong·an baksana IPC ni Section 273 niamo pangchake nanga sastiko on·a nanga ineba NGO dolrang janapangaha. Unbaksana Food Safety Officer naba ia ong·gipa obostani bidingo badi ka·angaha ineba janapataha.
Ia pilakon niroke kam ka∙nagita mikkangchi dongimin somoina batgimin aro nosto ong·gimin bosturangko dokan ba bajarrango palaniko champengnagita, dos donggipa mandeni kosako raka ja·kuko de·e niamo pangchake kragipa sastiko on·china NGO dolrang didiangaha.
