Da·al salo South Garo Hills Deku jolni nangrimgimin NGO-rang jekai FKJGP, AHAM aro GSMC dolrang Deku branch-na gitalgipa post office nokko on·china aro post master-ko rakkichina West Garo Hills Tura-ni Asst. Superintendent of Post Office-na Memorandum-ko on·angaha.
FKJGP-ni General Secretary, Jabath T Sangma-ni agananigitade ia post office-ko a·bachengataonin kamrangko ka·chakna chu·ongagita office nokrang dongja ine aganangaha. Deku branch office da·o dipete Dobasipara Sub-Office-na su·algimin pin code 794005 kosa jakkalenga. Office nok dongjani a·selo gitchambegipa PWD-ni quarter-kosa kamrangko ka·chakenga jean gitchambeahani gimin namen nosto ong·aha. Deku branch post office-ko chalaina namgipa nokrangko nangenganiko uamang janapataha.
Unbaksana, Deku branch-o ru·uta somoirangonin post master dongjani a·selo bang·a neng·nikanirangko man·enganina post master-ko on·chinagitaba aganangaha. Deku branch office-ko dingtang dingtang kamrang jakkalenga jekai Mail, bosturangko watatna, ra·chaksona, tangka dona, watna aro bikotna, unbaksana minggipin bang·a kamrangna dakchake on·enga. Post-Master dongjani a·selo Deku bazaar-ni wilwilao donggipa manderang nanggipa kamrangna re·baanioba bang·a neng·nikanirangko chagrongna nangenga maina bang·a manderangan a·bri jolo songdonggiparang ong·e Dobasipara sub office-ona bang·gija tangka paisarangko okna aro pension-ni tangkarangko nina re·bana altua ong·ja ine uamang memorandum-o janapataha.
MGNREGA-o manderangni man·gni tangka paisarangkoba post office gitaan watengani gimin Deku post office-o post master/madam-ko donchina NGO dolrang mol·molangaha. Deku jolo songdongenggipa manderangni neng·nikanirangko nirokate gital namgipa post office nokko on·china aro post-master ko taraken watatchina NGO dolrang aganangaha.
