A·chik Holistic Awakening Movement (AHAM) Southern Zone, adita nirokatna nangchongmotenggipa kamrangni bidingo ta·rake nirokatchina a·jani DC-na chittiko see mol·molataha.
Skanggipao, Baghmara Police Station-ni mikkango donggipa SBI ATM-ni namgija dongengani a·selo songdongenggipa manderang tangkarangko bikotna namen neng·nikaniko man·enga. Iani bidingo re·anggipa May jao daito donggiparangko ta·rake taripile on·china janapatanio ia nosto ong·e dongenggipa ATM-ko jasani gisepon tarie on·gen ine ku·chakmanahaoba da·onaba tarigija donchipkuenga ine janapataha. Manderangni neng·nikanirangko olgrokatna ia SBI ATM-ko nirokate man·a dipet ta·rake tarie on·chinagita AHAM dolrang mol·molataha.
Minggipinara, SGH a·jani wa·arangko niamni a·palo Bangladesh-ona Rompa aro Simsang chibimagita badingsrukenganiko dontongatchina didiangaha. Uamangni janapatanigitade, chengoni ripinge rakkienggipa diltugipa buring jekai Mindikgre, Asokgre, Namisikgre aro Agonggre jolni buring bolgrimrangni wa·arangko badingsrukaniara mikkangchi buring bolgrimko gimaataona sokgen ine AHAM dolrang janapataha.
Indake ong·engon janapgimin nirokatna nanggipa kamrangko songsalni aro manderangni namgnina nanggipa ja·kurangko de·an baksana mikkangchi niamni a·palo badingsrukanirangko dontongatna man·angita kamrangko ka·angchina a·jani DC-ko mol·molangaha.
