All Meghalaya SSA Non Teaching Staffs Association (AMSSANTSA), Education Department-ni Commissioner aro Secretary Vijay Mantri aro gipin senior official-rang baksa golporimani ja·mano uamangni dormahako 80 percent-ona bariatchina dabienganiko man·a ka·donganiko parakangaha. Indake ong·genchimoba sorkarioni maming see on·aniko man·ja dipetde uamang jingjengataniko dontonggija dakangkuna aganangskaaha.
SSA non-teaching staff-rang uamangni dormaharango adita dingtanggrikanirangko nigrike bang·a gadangrango chong·motan state, district, cluster aro block-o tosusaaniko dake 80 percent-ona bariatchina dabienga. Batanggimin changoba sorkarini daito gnanggiparangko grongon dormaharangko bariatna agananirang dongaha, ia chango association-ni ra·chakgimingita sorkarini 25 percent-ko bariatna agananiko ra·chakani dongjawa ine President Jennyfer J Synrem parakangaha.
Sak 1000 na bate SSA non-teaching staff-ni association-o bak ong·giparang ia jingjengataniko dakenga jeon uamang 80 percent dormahako bariatchina, seniority-o pangchake 2 percent aro 5 percent annual increment-ko on·china sorkario dabienga. Ia dabiani ru·utbea somoirangonin ong·a, jekon sorkari aro AMSSANTSA baksa bakrime rationalisation committee bikotgipa dingtang dingtang cholrangko am·rikkite nirokanggen.
