Rajabala-Balachanda-Selsella-Garobadha ramarangko jakkale jrigipa truck garirangko salenganiko bakan dontongchina WGH-ni Deputy Commissioner Jagdish Chelani ge·etaniko on·ataha. Indake batanggimin somoioba jrigipa truck garirangni AMPT ramako jakkale Bhutan-oniko Bangladesh-ona ro·ongrangko salruraanio dolong namgijagipani be·gruna am·anina dontongatna ge·etangaha.
Ia Rajabala-Balachanda-Selsella-Garobadha rama namen namjabegipa ong·e chonchongipa gari gorarangna re·ruraanio namen neng·nikanirangko chagrongna nangenga. Iani gisepon jrigipa truck garirang re·ruraanichi ramako nosto ong·dapaona sokatenga jeon songdongenggipa manderang salantio nanganina re·ruraanio neng·nikaniko man·enga.
Apsandaken jrigipa truck garirangko dontongatna gitalgipa ge·etanio Rajabala-Balachanda-Selsella-Garobadha ramako jakkale re·aniko dontongatan baksana AMPT ramako jakkale je garirangan 12 MT-ni ning·o jrie gate salenggipa garirangkosan Konachar sepango donggipa nosto ong·gimin RCC dolongko batsotna on·gen ine u·iatangaha.
Iani bidingo daito donggiparang pilakan ge·etgiminko ja·rikchina aro ramako jakkalna on·gijaniko sakantina u·iatchinaba DC didiangaha.
