August 3 tariko, Lariti Multipurpose Hall, Mawkasiang-o Miss Meghalaya aro Miss Teen Meghalaya 2024 ong·atani salo a·dokni me·tra chadamberangni nambee dakmesokanirangko nikangna man·aha. Miss Meghalaya 2024-ko Bahun Nongrum cheaha, jeon skanggipa runners up-ko Chaivalry Lartang aro gnigipa runners up-ko Lily Kharthangmaw cheangskaaha. Miss Meghalaya 2024, Bahun Nongrum a·dokni palo Miss Universe India 2024-o bakko ra·anggen aro skanggipa runners up Chaivalry Lartang Miss Northeast 2024-o susaangskagen.
Miss Teen category-o, Fortunate Mika Dkhar, Miss Teen Meghalaya 2024-ko cheangaha, skanggipa runners up-ko Palei Chyne aro gnigipa runners up-ko Nikita Nongrum man·angaha. Miss Teen Meghalaya 2024-ko chegipa Fortunate Mika Dkhar, Rajasthan Jaipur-o ong·nasienggipa Miss Teen Diva-o a·dokni palo bakko ra·e susaangna cholko man·angaha.
Ia Miss Meghalaya aro Miss Teen Meghalaya 2024-ko ong·atanio, Meghalaya Tourism, Arts & Culture-ni Minister, Paul Lyngdoh, mongsonggipa ong·e sokbaaha. Unbaksa, Meghalaya Tourism Development Corporation (MTDC)-ni Chairman, Sanbor Shullai aro Arts & Culture-ni Principal Secretary, Federick Roy-ba dongpae bakko ra·angaha.
Ia susaanio, Operations and Marketing for Miss Universe India-ni Director, Amjad Khan, Miss Grand International India 2023, Arshina Sumbul, Miss Universe Rajasthan-ni State Director aro Miss India Multinational 2021, Divija Gambhir, unbaksana Mele Pucho, Miss Universe Nagaland-ni State Director, panelist ong·e susaaniko nirokangaha.
Miss Meghalaya 2024-ko chegipana gong lakh 1, skanggipa runners up-na hajal 50 aro gnigipa runners up-na hajal 25-ko on·angaha. Miss Teen Meghalaya-ko chegipana gong hajal 25, gnigipana hajal 10 aro gittamgipana hajal 10-ko on·angskaaha.
