Adita somoirangna Bangladesh a·songo so·sojengjeng ong·ani a·selo Prime Minister Sheikh Hasina-ni dilanichi sorkariko chalaianio bang·a sinjentaniko man·angaha. Ia golmal ong·ani ja·pangara 1971 bilsio Bangladesh a·songko jakgitel ong·atna dakgrikgipa manderangni ma·drang maharirangna sorkarini kamrango 30% ko a·kange dongipako chatro chatrirang namnikjae sorkarini kosako ja·ku de·ani a·selo ong·aha.
Iani gisepon manderangni sinjetaniko man·e Sheikh Hasina uni Prime Minister-ni chokkioni da·al salo wate a·songoni gipin biapona katangaha ine parakataha. Koborrangko man·soanigitade Hasina Bangladesh-ni skotong Dhaka-oni kate India a·songona sokbaaha ine u·ina man·aha.
Ia kajia golmalrang dontongjani a·sel Hasina Prime Minister-ni kamko watna nangaona sokaha aro a·songko dilna Bangladesh-ni Army, President baksa chanchirime sorkariko rikangskagen ine koborko man·soaha.
