College of Community Science, Tura-ni Human Development & Family Studies department, World Breastfeeding Week-ko August 3 tariko campus ning·ao maniangaha. Ia manianio bi·sa gnanggipa sak 36 ma·giparang aro chatro chatrirang bakko ra·angtokaha jeon uamang sok kannani dingtang dingtang cholrang aro cha·a ringanio bi·sana simsakani bidingo golporimaniko dakangaha.
Tom·aniona, Medical and Child Health Officer, Dr. Ivonne M. Sangma mongsonggipa sokgipa ong·e bi·sarangna sok kannani cholrangko aro nama bewalo sok kanne chu·sokatna man·aniko agantalate on·angaha. College-ni Dean, Dr. Jyoti V Vastrad, Human Development & Family Studies (HDFS) ni course-o bi·sani dal·roroani bidingo ma·gipani sokko kannani aro chatro chatrirang songsalo ong·enggipa obostarangko ma·sie ra·na man·agita skie on·aniko aganangaha.
Dr. Brijendra Kumar Singh, KVK East Garo Hills-ni Principal Scientist, songadamrango ma·gipani bi·satangna sok kannani pangnan dakrongbewal ong·aniko aganange, skia pora donggipa ma·giparang iako gamchate ra·china u·iatangaha. Dr. KH. R. Aimol, College-o World Breastfeeding Week-ko maniani bako seminar, agangolporime chanchianirangko aro bang·a skie on·anirangko ia antio dakangani gimin adita agantalate on·angaha.
