North Garo Hills Khaldang Agitchak-o transformer nosto ong·ani a·selo poraienggipa chatro chatrirang, songdongenggipa manderang aro online gita kamrangko ka·enggiparang bang∙a neng·nikanirangko man·enga ine koborna parakataha.
Antisa-na skang Khaldang Agitchak-o Transformer nosto ong·ataniko man·e jolni manderang bijoli dongjae andal mindik dongna nangao ga·ake bang∙a neng∙nikanirangko chagrongtokenga ine u·iatangaha. Transformer nosto ong·genchimoba Mendipathar MeECL Department-o kamko ka·enggiparang gital transformer-ko teke on·eaba dongkuja aro re·bae nirokaniba dongkujaenga ineba aganangaha.
Ia obostako chagrongani ja∙mano songni manderang office-ona re·ange SDO-ko gronge transformer-ko on·china agananirangko dakon songni manderangko sengchina gitasa aganataha. Bilsi antian Khaldang Agitchak-o transformer nosto ong·simaniko nikna man·enga. Khaldang Agitchak songna 2004 bilsio bijoliko on·aonin transformer apsankon da·alona kingkingba jakkalna nangani a∙selo bang∙bata changon nosto ong·simaniko chagrongna nangenga. Transformer-ni nosto ong·ani gisepon bijolini bill rangko apsandaken gamna nangkuenga ine songdongenggipa manderang parakataha.
Indake songo neng∙nikanirang donggenchimoba Mendipathar MeECL Department-o kam ka·enggiparang bijoliko nirokna gisiko nangbregija mesokan baksana bill rangko nangana batpile tarie on∙enga aro bill rangko gamgenchimoba transformer-ko gital tarie on·gijaniara bijoliko game jakkalgipa manderangko kalake roagita dakenga ineba aganangaha.
Re·anggipa bilsio bijolini transformer nosto ong·ani bidingo adita songbadrango gatataninaba Mendipathar MeECL Department-o kamko ka·enggiparang songni manderangko ka∙mikkenataha ineba u∙iatangaha. Indake Khaldang Agitchak jolo songdongenggipa manderangni poraienggipa bi·sarangni neng∙nikanirangko nirokatnagita gitalgipa transformer-ko ta∙rakale teke on·china Chief Minister Conrad Sangma, Power Minister AT Mondal aro Education Minister Rakkam A Sangma-ko mol·molaniko dakangaha.
