Batanggimin June jani 30 tariko Nongalbibra Police Station-ni ning·o ong·gipa Jadigittim jolo me·chik saksani manggisiko man·aniko niknagita man·aha. Ia ong·a obostani bidingo Nongalbibra Police Station-o mokoldoma ka·e name am·sandianiko daknagita Investigation Officer-ko dakchakna Special Investigation Team (SIT) dolko songangaha.
Iani bidingo SIT dolrang gisik nangbee am·sandianiko dake dosi dakgipa sakgittam manderangko silchidare baksa rimna man·aha. Ia sakgittam rima man·gipa manderangara Rongsu Ronggrigittim, PO/PS-Siju, South Garo Hills oni Temul Marak ni depante David R Marak ong·a jekon uni da·o dongchakenggipa Krishnai PS ni ning·o ong·gipa Kacharipara, Chutipara, Assam oniko rim∙aha. Gnigipao Tatolgre, PO/PS-Bajengdoba, North Garo Hills oni Abing M Sangma ni Demen R Marak ong·a jekon Dagnanggre Rongsai, NGH oniko rim∙aha aro gittamgipao Tatolgre, Bajengdoba oni Temul Marak ni depante Salnara R Marak ong·a jekon Nongchram, PO/PS-Rongjeng East Garo Hills oniko rim∙aha.
Ia sakgittam dosi dakgiparangko rim∙ani somoio uamangni namgija kamko ka∙na jakkalenggipa silchidare jekai pistol ge∙gni aro degalrangko man·aha aro uamang Garo Hills ni dingtang dingtang biaprango dolrangko bikote tangka dabiani, rimsrukani aro indakgipa namgijagipa kamrangko ka·na ja·kurangko de·engachim ine pulis dolrang parakataha.
