WGH Dalu Phukan Memorial College-ni Principal Dimseng K. Sangma-ko uni kamoniko mamung dosigri College-ni Governing Body member-rangni galchrakna am·ani bidingo jolni adita nangrimgimin NGO dolrang GSU office-o mijal attam 2:30 baji mango tanggitik tom·e ra·chakna man·jawa ine jegalaniko dakangaha.
Ia tom·anio GSU President Gipseng N. Sangma, AYWO-ni General Secretary Sebastian D. Sangma, GSMC-ni Chairman Junstemey R Marak, Mothers Union dolni Secretary Archana Ch. Marak dongpae bakko ra·e ia kakketgijagipa kam ka·aniko uamang nie dongjawa aro ra·galgenchimode GB member-rangni kosako raka ja·kurangko ga·angnagita tik ka·angaha.
Dimseng K. Sangma uni Principal ong·e bimchipe kam ka·anichi poraiani a·bao bang·a namgniko man·an baksana Phukan Memorial College-o poraienggipa chatro chatrirang bang·a namgnirangko man·an baksana NEHU-o Master degree-rangko daknagita kragiparang ong·atangaha aro mikkangchiba skigipa baksana Principal-ni bimchipe dangdike on·anichi nambata gadango sokdonagita kadongsoenga ine janapangaha.
