Da·al salni bakko West Garo Hills a·jani Rongkhon aro Chitoktak gittimko repakenggipa Bajengdoba-Dalu re·gipa NH 51 ramako lane gniona apaldapatna miksonge ramasamo donggipa dokan nokrangko rue galangaha.
NH 51 ramako dal·dapatani kamrangko mija bilsirangonin ka·na a·bachengaha indioba da·ogita mikka wachi somoi ong·ani gimin kamrangko ta·rake ka·na neng·nikanirangko chagronganikoba nikna man·enga.
Ia dokan nokrangko rue galna, pilak dokan nokgiparangna skango ramarangko dal·dapatna toangmitingo mikkangchi dokanrangko runa nangnaba donga ine District Administration agantalatangaha. Apsandake da·alo rue galna am·anikoba nokgiparangna u·iatsoe mijal attamon administration-ni manderang survey-koba ka·angmanaha ine koborna parakataha.
