Dominic Megam Sangma-ni tarigipa ‘Rapture’ jawilwat changsatai, Malaysia-ni Kuala Lumpur-o ong·atanggipa chang 7 gipa Malaysian International Film Festival (MIFF)-o Best Cinematography award-ko man·angaha. Ia award-ko dingtangmancha jawilwatko tarianio gamchatbegipa jak donggipa cinematographer Tojo Xavier ra·chakangaha.
Rapture ba Rimdogittanga jawilwatko re·anggipa salrango French a·songo bang·a theatre-rango mesokangaha, ian Meghalaya-gita dakgipa chongipa a·dokna dal·bea chu·sokani ong·a. Iasan ong·aigija batanggimin changrango ia jawilwat international-ni gadango adita award-rangkoba man·angaha. Da·o changsatai MIFF-o chu·sokanian Garo Hills-o changa sapanio komigijaniko mesokan baksana Northeast Indian cinema-o bak ong·na chol ong·e a·gimiknaba niksenganiko ra·baaha.
Rapture jawilwat dingtangmancha jatni bebe ra·ani, daka rika, bewalrang, golporangko aro ong·enggipa obostarangko dondime tarigimin ong·a, jekon a·gimikni manderang me·sue niktokenga. Ia jawilwatko Garo Hills-o skanggipa Tura songjinmao August 15 tariko mesokanggen. Jawilwatko mesokani somoio bang·a jolni manderang aro namnikgiparang re·bae nina ka·dongsoenga.
