South Garo Hills, Rompa Asim-ni Nokma Chra, Ringnan M. Sangma, pilak Nokmarangni palo rubber ge·e cha·giparangko adita manderang dilsretna jotton ka·enganina aro niamni a·palo kragija kamrangko ka·anina uamangna kakket bichalko ra·bae on·china mokordoma ka·aniko parakataha. Iamang chu·gimik sak 9 mang manderang gnang jemangan tol·e sakkirangko on·e batanggimin salrango mokordoma ka·angaha jekon da·o Nokmarang bikpil uamangni kosako mokordomako ka·doangskaaha.
Ia namgijagipa kamko ka·enggipa manderangara, Pairamush M. Sangma, Andresh R. Marak aro uni jikgipa Elsni M. Sangma, unbaksa gipin sak 5 mang gnang. Iamangan rubber ge·e cha·gipa manderangko dagrange aro ka·mikkenate rubber badinganiko dontongchina ge·etangaha ine u·ina man·aha.
Baghmara thanao mokordoma ka·ani dongkuoba aro lakh 1 na bond-ko 2024 bilsini February 28 tariko semanahaoba ia manderang niamni a·palo kamrangko ka·na jotton ka·angkuenga. Iamangan pang 500-600 rubber bolrangko nosto ka·e gal·aha ineba koborna parakataha.
Mokordoma ka·ani bidingo Nokmarang bond segatani kosako niamko pe·ahanina District Magistrate-naba janapataha. Iarang pilakon mikkango done dosi dakgipa manderangni kosako raka ja·kuko de·e kakket bichalko on·china aro songo tom·tomaniko ra·bachina Nokmarang didiataha.
