Tura-o, Inter-School Basketball Tournament 2024-ko ong·atenggipani gnigipa salo me·asarang dolgni aro me·chikrangni kal·aniko Christian Girls’ Hr. Sec. School-ni kal·chakramo nikangaha.
Da·al salo me·chik dolrangni gisepo kal·anio, Don Bosco College Higher Secondary Section 53-6 chi St. Xavier’s Higher Secondary School-ko nengrabee amataha. Me·chikrang chu·gimik dol 4 san ong·ani gimin ian uamangni skanggipa semi final kal·ani ong·a jeon Don Bosco College Hr. Sec. Section final-ona dochenggipa ong·aha. Gnigipa semi final-ko Don Bosco Higher Secondary School baksa Christian Girls’ Higher Secondary School knal salo kal·angskagen.
Me·asarangni gisepo Don Bosco Higher Secondary School (Night) 53-34 chi Don Bosco Higher Secondary School, Rongkhon-ko amate chegipa ong·angaha. Ia susaaniko Meghalaya Basketball Association-ni dakchakaniko man·e District Basketball Association ong·atenga. Iano knockout niamo pangchake kal·atengani gimin je dolrangan ama cha·genchimode tournament-oni a·palo ong·na nanggen.
