District Legal Services Authority (DLSA) Tura, Juvenile Justice (Care and Protection of Children) Act, 2015-ni bidingo maikai bi·sarangna kakket bichalko ra·bae on·a aro uamangna nambate dangdike on·a man·agita District and Sessions Court, Tura-o agan-talate on·a programme-ko ong·atangaha.
Tura DLSA-ni District & Session Judge cum Chairperson A M Ripnar ia Act-ni bidingo gamchataniko aganengon, bi·sarangna nangchongmotgipa nirok simsakani, naljoke rakkiani, namaona ra·bapilna ba uandake dingtang dingtang namgnirangko dongimin niamrango pangchake kamrangko ka·na nanganirangko aganangaha. Unbaksana ia kamo Police-rangni daito dongani aro dakna nanggnirangni bidingo Dadenggre-ni SDPO Ishan Gupta, bi·sarangko sin·jete ba dosiko dakgipani kosako niamrangko ja·rike jakkandilani, Juvenile Justice Board aro Children Welfare Committee baksa bakrime, bi·sarangni bilo aro songsalni jakkalgipa niamrango pangchake nanggipa ja·kurangko de·ani bidingo che·eme talatangskaaha.
Una agreba bi·sarangni bilsirangko u·ie ra·ani, medical test ra·ani, gisiknigita chanchiako u·iani, niamrangko ja·rike nigrikani aro medical officer-rangni daito donganiko Tura-ni Senior Medical & Health Officer Dr. Angelice A. Sangma aganangaha.
Apsandaken Juvenile Justice Board-ni Ld. Judicial Magistrate first class cum Principal Magistrate L M Rymbai, niamrangko ja·rike Juvenile Justice Board-ni daitoko ra·e kam ka·na nangani bidingo aganangskaaha. Ia tom·aniona sokbagipa sakantina Child Welfare Committee-ni daito donganiko aganangaha jeon bi·sarangko nirok simsake aro naljoke rakkiani, gipin bako ong·giparang jekai police, NGO aro Juvenile Justice Board baksa bakrime bi·sarangko namaona ra·bapilna dangdike on·ani bidingo District Child Protection Unit, Tura-ni Walsmi R. Marak u·iatangaha.
Ia programme-o Tura DLSA-ni Ld Secretary Ishan R. Marak, Panel-ni ukilrang, Juvenile Justice Board-ni member-rang, Special Juvenile Police Unit, Police dolrang, Probation Officer, Dotor-rang aro Para Legal Volunteer-rang dongpae bakko ra·angtokaha.
