Tura songjinmao traffic police-rang baksa kamo rakkia man·pagipa Meghalaya Home Guard personnel-rang uamangni jabrina man·a nanggni betonrangko da·onaba on·kujaenganina tarake sorkariko nirokatchina mol·molangaha.
Uamangni janapatanigitade, indita bimchipe kamo dangdike on·genchimoba da·onaba ja brina kingking dormaharangko man·kuja jeon Khasi Hills-o dangdike on·giparangde jaanti man·enganina suk ong·gijaniko parakataha. Indake gipin biaprango dangdike on·giparangna jarikit dormaharangko on·ani gisepon Tura-o bimchipe dangdike on·enggipa Home Guard rangna beton on·gijaniara nichanggalagita ong·a. Mande ong·e sakantian salantio nokdangko nirok simsakna nanga aro janggi tangna bang·a nanganirang donga ine uamang janapataha.
Mikkangchi indake betonrangko on·anirang tik ong·jaode kamtangko wate janggitangna gipin cholrangko am·na nangaona sokangnaba donga ine aganangan baksana uamangni man·gni dormaharangko ta·rake on·chinagitaba mol·molangaha. Traffic police-rang baksa rakkia man·gipa sak 300 home guard-rangni beton man·kujae neng·nikani bidingo A·chik Progressive Aprroach (APA) ku·rang on·ataha aro iani bidingo nirokatchina sorkariko mol·molataha.
