Tura songjinmani skulrangna District Basketball Association Tura, DSO baksa bakrime antisana ong·atenggipa Inter-School Basketball Tournament 2024-ni skanggipa kal·susaaniko Christian Girls’ Higher Secondary School, Tura-o ong·ate da·aloni a·bachengataha. Ia bilsini Inter-School ba Tura-ni school-rangni gisepo basketball kal·susaaniko July 29-oni August 2 tarikona ong·atangenga jeon me·a aro me·chik dolgnian bakko ra·angenga.
Me·asarang chu·gimik dol 11 aro me·chik bi·sarang dol 4 bakko ra·e skul ge·sa ge·gipin baksa donsogimin sal aro somoirango susaanggen. Me·asa dolrangni gisepo Don Bosco Junior College, Auxilium School, St. Xavier’s School,Don Bosco School Rongkhon,Don Bosco School (Night),Bosco Mount aro Don Bosco School (Day) bakko ra·enga. Me·chik dolrangni gisepo St. Xaviers School, Don Bosco Junior College, Don Bosco School aro Christian Girl’s Higher Secondary School dolbri susaangskagen. Kal·ani niamko knockout-o pangchake ong·atenga.
Ia susaanio skanggipa kal·aniko da·al salni 3:00 bajimango me·asa dolrangni gisepo Auxilium Higher Secondary School aro St. Xavier’s Higher Secondary School baksa kal·angaha. Kal·a chu·gimiko Auxilium school 52-14 chi St. Xavier’s school-ko Jaisen M. Sangma-ni saksan 20 point-rangna bate chipanichi altubee amataha.
Knalo me·chikrangni gisepo kal·aniko Don Bosco Higher Secondary Section aro St. Xavier’s Higher Secondary school, me·asarang Don Bosco School Rongkhon aro Don Bosco School (Night) dolrangni gisepo attam 3:00 bajimango apsan biapon susaanggen.
