Mijal salni bako SWGH Betasing C&RD Block-o gital rikmangipa Block Integrated Development Complex-ko a·dokni Chief Minister Conrad K Sangma oprake ong·angaha. Ia program-o C&RD aro Power Minister, A T. Mondal, Salmanpara-ni MLA Ian Botham Sangma, Mahendraganj-ni MLA Sanjay Sangma, Rangsakona-ni MLA Subir Marak, Boldamgre-ni MDC Stevie Marak, dingtang dingtang department-ni aro a·jani Officer-rangba dongpae bakko ra·angaha.
Ia gitalgipa building-ko rika cho·anio tom·tome matchotatna man·anina jolni manderangko mitelan baksa Sangma uni 2018 bilsio Chief Minister-ni kamko jako ra·ani somoio a·doko chu·ongagita sorkari office, LP Skul, PHC aro CHC-rang donggijaniko aganangaha. Indakgipa kamrangko ka·na somoirangko nanggenchimoba manderangna namgniko ra·banagita sorkari bimchipe kamko ka·enga ine Sangma aganangaha. Bang·a department-rangna gital office nokrangko riknagita tangka paisarangko chamanaha aro dingtang dingtang department-ni gital rikgimin building-rangko ia bilsini gisepo oprake on·a miksonganikoba Sangma aganangaha.
Una agreba office-ona nanga kamna re·bagipa manderangna sengchakram biap, mikka chiko chimonge donani aro solar power-rangko tarichina gitaba Sangma, Administration-ko didiangaha. Ia gitalgipa building nok te·sagitasan ong·aia indiba official-rangni bimchipe, simsake aro name dangdike on·achisa dingtangataniko ra·banagita amgen ine aganan baksana BDO aro Block Officer-rang neng·nikanirang donggenchimoba manderangni namgnina chu·gimik dangdike on·china didiangaha. Apsandake songdongenggipa manderangkoba office-o kam ka·giparangni neng·nikanirangko ma·sichakgrike sinjetanirangko on·jachinaba Sangma didiangaha. Meghalaya a·doko indakgipa kamrangko name ka·anichi ma·mong sorkari nigita bang·bate tangka paisarangko chamatanikoba man·engaha ineba Sangma aganangaha.
CM Sangma-ni songdamo songdongenggipa manderangna namgniko on·agita bimchipe kamrangko ka·engani C&RD Minister AT Mondal de·mittelan baksa gital C&RD Office nokko on·anian songadam nokadamko ra·dona kam ka·ani ong·a ine aganangaha. Ia gitalgipa Block Office-ko on·anichi songdongenggipa manderangna bang·a namgnirangko ra·bagen ine aganan baksana ma·mong sokarini scheme-rangko man·a amnagita aadhaar card-rangko bank baksa link ka·chinaba didiangjolaha.
