Department of Education, Samagra Shiksha Abhiyan Office-ni Cluster Level, Block Level, District Level aro State Level-o kam ka·enggiparang jemangan All Meghalaya SSA Non-Teaching Staffs Association (AMSNSA) ni ning·o ong·giparang, Shillong Madan Malki kal·chakram biapo mijal salni bako bakrime tom·e chanchirimangaha.
Ia tom·aniko ong·atani miksonganiara maikai aro maidakgipa cholrangchi a·dok sorkariko uamangni dormaharangko bariatna dabianiko chu·sokatna man·a amani bidingo chanchirimangaha. Uamangni janapanigitade, 2016 bilsionin uamangni betonko da·onaba bariatgija donkuenga. A·dok sorkari uamangni dabianiko knachakjana kingking uamang apsan ku·monge July 29 tarikoni dong·tonggija Sit-In-Demonstation-ko daknagita tik ka·angaha.
Re·anggipa 2023 bilsini Assembly-o, Education Minister dormaharangko bariatna segimin file-rangko Finance Department-ona watatmanaha ine aganchakgenchimoba, da·onaba uamangni dormaharangko bariatani dongkuja aro uni tol·e ku·mikchetaniara Assembly-ni gimik member-rangko dilsretani ong·a ine uamang matnangataha. Una agreba uamangni tik ka·gimin Sit-In Demonstration-o bak ra·na ra·chakangtokahani gisepon ia kamko ka·aniara sorkarini kosako chakatani ong·ja indiba uamangni man·gniko dabina bil gnanganiko mesokanisan ong·a ine Non Teaching staff-rang aganangaha.
