Meghalaya a·dokni dingtang dingtang post office-rango Gramin Dak Sevaks-ni kamrangna galenggiparangna nambata cholko on·a Ministry of Communication-ni Post Department, Khasi aro Garo ku·sikko basena man·agita gital Office Memorandum-ko on·e ra·gatangaha. Iani bidingo FKJGP-ni President Dundee C Khongsit re·anggipa 2023 bilsini 21 tariko Hindi aro English ku·sikko nangchongmotgipa dake jakkalanichi a·doktangni manderang chol man·jaenganiko Chief Minister Conrad Sangma-na janapataha.
Iani bidingo a·dokni manderangni neng·nikaniko janapataniko man·e, Chief Minister Conrad Sangma, ma·mong sorkarini Union Minister for Communication, Ashwini Vaishnaw-na May ja 2023 bilsion nirokatchina mol·molataha. Sangma, dingtang mancha ma·mongni Minister-o Gramin Dak Sevaks-ni kamrangna Hindi aro English-ko jakkalan baksa Khasi aro Garo ku·sikkoba ra·gatchina ja·kurangko ga·angaha.
Ia gitalgipa OM-o, East Khasi Hills, West Jaintia Hills, East Jaintia Hills, South West Khasi Hills, West Khasi Hills, Eastern West Khasi Hills aro Ri-Bhoi a·jarango da·o English, Hindi aro Khasi ku·sikkoba napataha. Apsandake, East Garo Hills, West Garo Hills, South West Garo Hills, North Garo Hills, aro South Garo Hills-o English, Hindi aro Garo ku·sikko jakkalna man·angskagen. Re∙anggipa sal somoirango Meghalaya-ni manderangna English aro Hindi ku·sikkosan napataha jeon a·doktangni manderang a·palchini re·bagiparang baksa ia ku·sikrango ja·manchake susagrikna neng·nikaniko man·angaha aro chu·sokna cholko man·jaha.
