Ampati, July 25, 2024: SWGH District Administration, block-level-nigita songsalni manderang baksa agan-golpogrikani programme-ko CM-Connect-ni ning·o Ampati Mini Stadium-o ong·atangaha. Ia programme-o Chief Minister Conrad Sangma an·tangan donge, manderangni neng·nikani aro nangnikanirangko knae ra·e biapon aganchakanirangko on·angaha.
Ia programme-o dingtang dingtang line department-rangni officialrang aro department-ni head-rangni gisik nange bak ra·anganiko nikangna man·aha jemangan manderangni neng·nikani aro sing·doanirangna aganchakangaha. Manderangni neng·nikanirang jekai rama jal·ang, ringani chi, bijoliko tik ong·e watgijani, poraia skiani a·bao aro uandake dingtang dingtang neng·nikanirangni bidingo agangolpogrikangaha.
Bang·a neng·nikanirangko knaangani ja·mano, adita nangnikanirangko CM ua biapon cholko ra·e kamko ka·angaha. Unbaksana mitam nangnikanirangna man·a kragipa manderangna cheque-rangkoba sualangaha. Adita neng·nikanirangko knae ra·e ia neng·nikanirangni bidingo nambate u·ie ra·chenge kamrangko ka·anggen ine CM aganangaha. Iani gisepon mitam waiting shed-rangko rika cho·anirangko man·a kragipa manderang man·kugijanirangkoba u·ie ra·angaha.
Una agreba CM-Connect-ni gamchataniko aganengon, ian sorkarini ong·atenggipa ja·ku de·ani ong·a aro helpline number 1971-ona call ka·ate an·tangtangni neng·nikanirangna ku·rang on·angkuchina CM didiangaha. Indake manderangni chu·gimik namgnina uamangni neng·nikanirangko kim·kim ong·e dangdike on·angchina, sorkarini officialrangko CM ge·etangaha. Apsan daken biapona re·ange manderangni neng·nikanirangko rongtale agantalate manderangna kim·kim ong·e dangdike on·aninaba, CM official-rangko mittelpilangskaaha.
Ua jolni Women Community member-rangna, Village Organization-rangna aro Self Help Group-rangna chu·gimik gong 3.20 crore-ni cheque-rangko on·e dakchakangaha. Unbaksana CM-Elevate programme-ni ning·o Garo Hills-ni dingtang dingtang a·jani sak 6 manderangna Agriculture Response Vehicle-rangkoba on·angjolaha.
Ia programme-o Power Minister AT Mondal, Salmanpara-ni MLA Ian Botham Sangma, Mahendraganj-ni MLA Sanjay Sangma, Rangsakona-ni MLA Subir Marak aro Boldamgre-ni MDC Stevie Marak-ba dongpae bakko ra·angaha.
