Khasi-Jaintia Hills aro Garo Hills-ni ge 9 NGO dolrang a∙dokona niamgri kam ka∙na napbagipa manderangko nirok simsakna Meghalaya Residents Safety and Security Act (MRSSA), 2016-ko an∙tangtangni jako ra∙e ra∙gatna miksonganiko Budbar salo parakataha. Ia chanchirimaniko Shillong songjinmao Khasi Students’ Union (KSU), Federation of Khasi Jaintia and Garo People (FKJGP), Hynniewtrep National Youth Front (HNYF), Ri Bhoi Youth Federation (RBYF), Jaintia Students’ Union (JSU), Garo Students’ Union (GSU), Achik Youth Welfare Organization (AYWO), Federation for Achik Freedom (FAF) aro Association for Democracy and Empowerment (ADE) dolrang tom∙e tik ka∙angaha.
A∙dok sorkarini gisiko nanggijani a∙selo, MRSSA-ko a∙dokni pilak biaprango jakkalanggen ine KSU ni President Lambokstarwell Marngar kobor ra∙timgiparangna parakataha. Iako aganengon sorkarinigita ia niamko jakkalna chu∙ongagita manderang dongjani a∙sel ra∙gatna man∙kujaenggen ine chanchichipe parakataha aro gipin a∙dokrangoni kam ka∙na re∙bagiparangni nanggipa lekka pancharang donga-donggijaniko nirokanggen ineba Marngar aganangaha.
Garo Hills-ni FKJGP-ni President Pritam Arengh-ba ia MRSSA-ko ra∙gate on∙china dingtang dingtang ja∙kurangko de∙e a∙dok sorkario dabianiko dakanggen ine parakangaha. Unbaksana gipin NGO dolrangba ia niamko aro ILP-ko ta∙rake ra∙gate on∙china dabianiko dakgenchimoba ma∙mong sorkarinigita da∙ona kingkingba maming ja∙ku de∙aniko nikujaenga ine janapangaha.
