Dalu, Barengapara anti jolo Borewell cho·enggipako Dalu unit-ni GSU, AWYO aro GSMC dolrang nangrime, samtangtango donggipa bol wa·arang aro chiring chibisikrangna maming namgijaniko ra·bajachina nokgipako mol·mole dontongataha.
Borewell tarienggipa nokgipa Ram Kumar, NGO rangni mol·molaniko ra·chakenba bakrimaniko on·e kamrangko dontongatna tik ka·angskaaha. Borewell-rangko ramramari tarianiko ru·utbea somoirangonin sorkari champengataha aro department-nigita bang·a dakna nanggnirangko ka·ani ja·manosa tarina niamrangko donaha.
Skanggipao, borewell-ko tarina Meghalaya-ni Water Resource Department-o sing·e ra·chengna nanga aro kamrangko a·bachengna dorgasto galani form-ko ra·e kakketgipa kattarangchi name gapatna nanga. Borewell tarinasiengon, nokgipani ID card, address proof, a·ani nanggipa lekkarang, NOC, gamna nanganirang aro gipin dakna nanggnirangko department-na pakwatna nangao ga·aka.
Water Resources Department, dorgastorangko niamo pangchake name che·eme niangani ja·manosa ra·chakenba a·damona re·ange nirokea. A·damona re·ange nirokani ja·mano maming jeani dongjaosa tarina raiko on·a. Borewell tarigipakoba licence gnanggipa aro sapgipakosa rimna nanga maina uamang skatang tarina man·ja chong·motan niamrangko ja·rikesa tarina man·a. Iasan ong·aigija, tarimanani ja·manoba borewell-ko nirok simsakna nangkua aro department ba tarigipa agency-ni nanggipa lekkarangko am·on je somoio pakwatna man·a nanga.
NGO dolrang iarang pilakon janapate, manderangna niamrangkoba talatangaha aro da·al salo Dalu Barengapara-o niamni a·palo borewell tarienggipako dontongataha. Ian mikkangchi samtangtango donggipa chiring chibisikrangna maming namgijaniko ba nosto ong·ataniko ra·bajachina aro manderangna mikrakaniko on·a ja·ku ga·aniba ong·a ine NGO dolrang parakataha.
