Baghmara, July 25, 2024: South Garo Hills Baghmara-ni District Transport Officer (DTO) kamtangko tik ong·e ka·jaenganina aro niamni a·palo garirangoniko tangka gilenganina ACHIK Krima Council H.Q. Tura-ni Vice President Greneth M. Sangma Chief Minister Conrad Sangma-na chittiko sedoataha. Baghmara-o songdongenggipa bang·a gari salgipa aro garini nokgiparang DTO-ni kosako niamni a·palo check gate-rangko kulie garirangoniko tangka paisa gilanirangko dakenga ine matnanganirangko knasona man·aha ine Sangma janapataha.
Apsandaken DTO kamtangko tik ong·e ka·jani a·sel bang·a manderangni driving licence, Registration Certificate (RC) aro garini nanggipa lekka pancharangko tarianio bilsisana batpilomangba tarigija galchipe donachi manderangna namen neng·nikanirangko on·enga ineba Sangma janapangaha. Iani gisepon Baghmara-o Motor Vehicle Inspector (MVI) aro pulisrang salantio check ka·ani a·selo jolo manderangna gari gorao re·ruraanio namen neng·nikanikoba on·enga ineba Sangma janapangaha.
Indakgipa obostarangko chagrongenganina Baghmara-ni DTO-ko gipin biapchi watatchina aro niamnigita nanggipa ja·kurangko de·e nirokatchina CM-ko didiangaha. Una agreba indake niamgri gari gorarangoniko tangka paisarangko gilenganina Baghmara DTO-ni kosako Baghmara Police Station-o badi ka·anikoba dakangaha.
