Meghalaya-ona gipin a∙dokrangoni maming nanggipa lekka pancha gri kamrangko ka∙e cha·nagita re∙bagiparangko a∙dokni dongimin niamrango pangchake ta·rake champengatchina UDP-ni President, Metbah Lyngdoh sorkariko didiangaha. Indake a·palchini manderang a∙dokna re∙bae kamrangko ka∙e cha∙aniara mikkangchina a∙dokna aro a∙dokni manderangna mikraksona nangani ong∙enga ineba Metbah aganangaha. Iani gisepon a∙dokona gipinchini kam ka∙na re∙bagipa manderangko, company-rangko aro contractor-rangko nirok sandinagita sorkari nanggipa niamrangko tarimanaha aro ia dongimin niamrangko ja·rike kamrangko ka∙china Metbah sorkariko didiangha. Apsandaken a∙doko kamrangko ka∙e cha·na cholko on·a man·agita a∙dokni manderangko rakkichinaba aganangaha.
A∙doko dingtang dingtang NGO dolrang gipin a∙dokoni maming nanggipa lekka pancha gri kam ka∙e cha·na re∙bagipa manderangko am∙sandie sak 2,500 mangnigita watpilatanirangko niknagita man∙angaha. Uamangni ia kamko ka∙anira sorkarini Meghalaya Residents Safety and Security Act aro Inner Line Permit-ko a∙doko ra∙gatjani a∙sel ong∙a ine uamang aganangaha.
Indake ong∙enggon a∙doko 90% mangnigita rika cho·ani kamko ka∙enggipa manderang wate re∙angtokaha aro re∙bapilnagita neng·niktokengaha ine dingtang dingtang project-rangko ka∙enggipa contractor-rang aganangskaaha.
