Nepal a·songo Kathmandu airport-o sildorengko wa·al kame a·sel ong·anio chu·gimik sak 18 manderang sianiko airport-ni official-rang parakataha. Ia dal·begipa a·selo, sak 2 crew member aro sak 17 technician-rangko gate ge·gipin nosto ong·gimin sildorengko tarina Pokhara songjinmaona salangmitingo ong·aha.
Sildorengko chalaigipa captain saksa ia a·selo chagronge janggi jokna man·aha aro uko da·o hospital-o sanna bananiko dakenga ine Kathmandu Tribhuvan International Airport-ni ku·wattimgipa Tej Bahadur Poudyal parakataha. Wa·al kame a·sel ong·anio naljokatgipa dolrang bilakbee kamgipa wa·alko kimitna jotton ka·beoba man·jaha.
Ia sildorengko Nepal-ni Saurya Airline nirokenga jeon uamang ge·gni Bombardier CRJ-200 regional jet-ko bilsi 20-na bate chalaienga ine Flight Radar 24-ni parakatanio ma·sina man·aha. Sildorengrangni a·sel ong·anio Nepal a·song bang·a changon bimingko man·ronggipa ong·a jeon batanggimin changrangoba bang·en a·sel ong·anirangko nikangaha. Re·anggipa 2023 bilsio Yeti airlines-ni a·sel ong·anichi sak 72 manderang siangaha jeon ja·man ja·wilo sing·sandie nion bijoliko gualsrete pilot-ni den·e donatani gimin ong·aha ine ma·sina man·aha.
1992 bilsioba Pakistan International Airlines Airbus-ni Kathmandu-ona re·baenggipa a·brio chatinggrike dal·begipa aro kenbegnigipa a·sel ong·anio sak 167 manderang janggirangko gimaataha.
