Tura, July 24, 2024: Da·al attamni bako gitalgipa Matchakolgre Multi-Facility Community Hall-ko Chief Minister Conrad Sangma, Mahendraganj-ni MLA Sanjay A. Sangma, West Garo Hills-ni Deputy Commissioner Jagdish Chelani, Tura Municipal Board-ni Chief Executive Officer Rikse R Marak, aro dingtang dingtang department-ni officialrangni dongpaanio oprake on·angaha.
Ia tom·anio aganengon, Chief Minister dingtangmancha Development Committee-ni dilgiparangni gisik nange kamrangko ka·anio dangdike on·anina aro jolo ia Multi-Facility Community Hall-ko chu·soke matchotatna man·anina uamangko mittelpilangskaaha. A·dokni chadamberangna bang·a cholrangko ra·bana Yess Meghalaya project-chi dakchake on·anio chu·sokanina, wilwilao donggipa chadamberang ia project-na dorgastoko gale namgniko ra·chinaba Sangma didiangaha. Re·anggipa bilsirango ia project-ni chu·sokaniko janapangan baksana ia project-na chamatgipa tangka paisarangko skangna bate chang 10 mangnigita bariataha ineba Sangma parakangaha.
Una agreba gittimni manderangko, Development Committee-ni dilgiparang, Me·chikma dolrang, chadambe dolrang aro gipin gisiko nanggiparangko dingtangmancha changa sapaniko namdapatna aro training programme-rangko ong·atna nanganiko Chief Minister didiangaha. Iako aganengon indakgipa programme-rangko ong·atna sorkarinigita tangka paisarangni bidingo dakchakna amanikoba Sangma parakangaha.
Conrad Sangma uni Chief Minister aro MLA ong·e niksamsoe kamrangko ka·na miksonganikoba janape, re·anggipa bilsi 5-o adita gittimrango rika cho·ani kamrang jekai rama jal·angrangko namdapataniko Smart Town Project-nigita ka·angkuna miksonganiko janapangaha. Unbaksana Street Light Project aro Tura Beautification Project-ni second phase-ko dingtang dingtang gitttimrangni niksenggipa biaprango tarina miksonganikoba Sangma aganangaha.
Bon·kame Chief Minister manderangming baksa agan golpogrikaniko dake uamangni neng·nikaniko knae ra·e mikkangchi nambate kamrangko ka·e dangdike on·angna aganangaha.
