East Garo Hills-ni Dagal Apal songo a·jani PHE official-rang mande ma∙sigijako JJM project-ni Village Water & Sanitation Committee (VWSC)-na seokanina Garo Hills Youth Solidarity (GHYS) H.Q Williamnagar-ni President Endick Marak jegalataha. Ma·mong sorkarini dongimin niamogita JJM project-ko man·gipa biapni wilwilao songdonggipa ba songtangni mandekosa seoknagita nanggenchimoba uamang dongimin niamni kosako kamrangko ka·angaha ine Marak matnangataha.
Songni manderang gital seokgipa VWSC member-rangni bimingrangko JJM-ni see rakkigiminiko nion Dagal Apal songni saksaba dongjanina aiao inmanpilaha ine Marak janapangaha. JJM project-na chamatgipa tangka paisarangoniko VWSC-rang jensalo project-ko man∙ani ja∙man kamrangko nirok simsakna 5% ko chamatgipa donga jenan PHE officer-rangni kamrangko niatgenchimode ia tangka paisana mikboke kam ka∙aniko mesoka ine Marak janapataha.
Songdongenggipa manderangna kakket ong∙e kamrangko ka∙e on∙a man∙agita, VWSC member-na songni manderangonikon seoke uamangna name agan skie on·chinaba aganangaha. Unbaksana ia JJM project-na tarigimin Detailed Project Report-o pangchake kamrangko ka·chinagita contractor-ko didian baksana ia project-oniko namgniko man∙agipa nokdangrangko niroke ka∙na nanganikoba Marak janapangaha.
Da∙o dipet Dagal Apal-o ka∙enggipa JJM-ni project-ni kamrang namen ka∙sinenganiko nikna man∙enga ineba parakataha. Songni manderangni janapatanigitade ia project-ko matchotgenchimoba bang∙a namgnirangko nikna neng∙gen maina wachi karini somoion chiringrangni dal∙aniko nikoba ia JJM pipe-rango maming chi jokanikoba nikna man∙kuja ine ka∙donggijani kattarangko aganangaha.
