EGH Samanda C&RD Block-ni Block Integrated Development Complex-ko Meghalaya C&RD Block-ni Minister AT Mondal da·alo oprake on·angaha. Ia gitalgipa building-ko oprake on·anio Soil and Water Conservation Minister Marcuise Marak, a·jani Deputy Commissioner Vibhor Aggarwal, DRDA-ni Project Director Reuben Ch. Momin, Samanda-ni BDO Tochri R. Sangma, adita dilgiparang, Nokma sordar-rang aro Samanda Block-ni ning·o donggipa songni manderangba dongpae bakko ra·angaha.
A·dok gimiko dingtang dingtang C&RD Block-ni office building-na rika cho·anirangko daknagita tangka paisarangko Chief Minister chamataha jeon Samanda C&RD block-an rika cho·anirangko man·chenge skanggipa changna oprake on·ani ong·a ine Mondal aganangaha. Ia gitalgipa building-ko oprake on·anichi songdongenggipa manderangna namen dakchakani ong·angan baksana ma·mong sorkarioniko namgnirangko aro dingtang dingtang scheme-rangko C&RD Block-rangni ning·o donggipa songni manderangna man·anggen ine Mondal aganangaha. Unbaksana Samanda C&RD Block-ni gital office building-ko man·anichi sorkari manderang baksa bakrime kamrangko ka·angna cholko on·aniba ong·gen ine Mondal agandapangaha.
Samanda C&RD Block-ni ning·o donggipa songni manderang bang·a namgnirangko, dingtang dingtang scheme-rangko aro project-rangko man·agita cholko man·anggen ine Soil and Water Conservation, PHE Minister Marcuise Marak aganangaha.
Ia program-o Deputy Commissioner Vibhor Aggarwal rimchaksoani kattarangko aganangaha aro DRDA-ni Project Director Reuben Ch. Momin mittelpilani kattarangko aganangskaaha. Una agreba Williamnagar-ni Warimagre Govt. L.P School-na gong 73,36,000 tangkarangchi District Mineral Fund-ni ning·o rikgimin gitalgipa building-koba Soil and Water Conservation-ni Minister Marcuise Marak oprake on·angjolaha.
