North East a·dokrangni dam 10 Autonomous Council (AC) aro Territorial Council (TC)-rang bakrime Sixth Schedule-ni niam retirangko adita dingtangatna miksonge BJP dolchi chalaienggipa NDA sorkariko New Delhi-o gronge chanchirimna tik ka∙angaha. Iani bidingo da·al saloni a·bachengenggipa Parliament-ni budget session ni tom∙anio Constitution (One Hundred and Twenty-fifth) Bill, 2019-ko chanchianiona ra∙bachina nangnikaniko uamang Home Minister Amit Shah ko gronge golpogrikna tik ka∙angaha.
Ia chanchianiko re·anggipa Sonibar salo Indiani skotong songjinma New Delhi-o dam 10 AC aro TC rang chongmotan Khasi Hills Autonomous District Council, Jaintia Hills Autonomous District Council, Garo Hills Autonomous District Council, Bodo Territorial Council, Tripura Territorial Council, Karbi Anglong Autonomous Council, Dima Hasao Autonomous Council aro Mizoram a·dokni dam gittam ADC jean Lai Autonomous District Council, Chakma Autonomous District Council and Mara Autonomous District Council bakrime, Indigenous Progressive Regional Alliance-ni Chairman Pradyot Manikya Deb Barma-ni dilanichi jinma ku·monge ra·chakangaha.
