Dobu PHC-ni Community Health Officer Nanda Marak-ni kosako matnange agane songbadrango gatate parakatani bidingo name tale ma∙sina aro namgrikatna NGO dolrang re·anggipa July 19 tariko tom∙aniko dake East Garo Hills Williamnagar-ni District Medical and Health Officer-naba chitti seachi u∙iataniko on∙angaha.
Ia tom·anio adita NGO dolrang, matnange aganatgipa manderang aro Nanda Marak-ba dongpae an∙tangtangni neng∙nikanirangko jinmana parake on∙angaha. Nanda Marak-ni indake kragijagipa kattarangko jakkalanian an∙tangni kamo cholon bewal namgijaniko mesokani ong∙a ine ASHA, Field Health Worker aro ANM-rang Marak ni kosako matnangan baksana suk ong∙gijaniko parakangaha. Ia pilakan PHC-o ka∙enggipa ka·rimskarangni gisiko nanggijani kamrangko ka∙anichi ua gisikni gita bringbrangataniko man·e uko ka∙o nangaonaba sokataha ine Nanda Marak talatangskaaha.
Ian dolgnini gisepo ma·sisrete matnange agananirangona sokanian uamangni field work rango name kamrangko ka·jani a·selba ong·aha. Iani bidingo uamang saksa sakgipinko ma∙sichakgrike mikkangchi manderangni namgnina meli nangrime kamrangko ka·angna gisik on·anikoba aganangaha ine NGO dolrang janapangaha.
Batanggimin salrango ong∙anggimin obostarangko guale aro kema ka·grike dongchina Dobu PHC-o kam ka·giparangko NGO dolrang mol∙molangaha. Unbaksana mikkangchi apsan meli nangrime donge songdongenggipa manderangna kakket ong·e kamrangko ka·angchinaba NGO dolrang didianiko on∙angjolangaha.
