Re∙anggipa July 16 tariko North East State Level Eligiblility Test (NESLET) Commission, Guwahati, North Jalukbari, Assam-ni Member Secretary-ko Garoland State Movement Committee (GSMC) CEC, H. Q. Tura-ni dilgiparang gronge dingtangmancha porikkako sechakna Centre-ko Tura-o songe on∙china didiangaha. Uamangni gronganio porikka seani centre-ko Tura, NEHU Campus-o songe on∙angna ku∙chakangaha ine GSMC parakataha. Apsandaken A∙chik chatro chatrirangna porikka seanio neng∙nikaniko komiatchina July 18 tarik, Bristibar salo Tura NEHU-ni Campus Director Prof. J. U. Ahmed-naba uamang memorandum-ko on∙angjolangaha jeon ua NEHU-ni Vice-Chancellor baksa iani bidingo chanchirime bimang ong∙atna ku∙chakangaha.
Uamangko gronganio GSMC-ni Co-Chairman Balkarin Ch. Marak, Co-Chairman Jakrak A. Sangma, Publicity Secretary Chevibirth K. Marak, Asst. Organising Secretary Nikcheng Ch. Marak aro Tony Tojrang B. Marak re∙ange nanggipa kamrangko ka∙e on∙china mol∙molangaha.
Ma∙mong sorkarini 1988 bilsio u∙iatanigitade, Asst. Professor-ni gadango seokako man∙a kragipara nanggipa qualification-rang donggenchimoba National Eligibility Test (NET)-ni porikkaoba chu∙sokna nanga. Indake India a∙song gimiko namgipa gadango graduate aro post graduate-ni skigiparangko rakkina ia State Level Eligibility Test (SLET) namen gamchatbegipa ong∙a ine u∙iatangaha. Ia gadangko rakkinagita Humanities and Social Science subject-rango Asst. Professor-ni kamna University Grants Commission (UGC) porikkako ra∙enga. Apsan daken Science subject ra∙giparangna Council of Scientific and Industrial Research (CSIR) porikkako ra∙skaenga.
Indakgipa porikkarangko an∙tangtang ra∙gatna ba UGC-CSIR-gita apsananggipa jean UGC-nigita ra∙chakgimin gadangni porikkako ra∙china State aro Union Territory-rangni sorkarirangko UGC ge∙etangaha. Ia ge∙etanina bang∙bata a∙dokrangan Asst. Professor-ni kamna rimnapanio State Level Eligibility Test (SLET) ko ra∙gatna kamrangko ka∙angaha. Apsandaken North East a∙jarangni manderangna, North East State Level Eligibility Test (NESLET) ko ra∙gatchina 26-06-2000-o janapangaha. Ia ja∙kuko de∙anichi SLET Commission Assam (N.E. Region) ko songe on∙angaha jekon SET (STATE ELIGIBILITY TEST) ine bon∙kame mingjitskaaha. Ia porikkarangko North East-ni gimik a∙dokrang jekai Assam, Arunachal Pradesh, Mizoram, Manipur, Meghalaya, Nagaland, Sikkim aro Tripura-o seataniko dakrongenga.
Meghalaya a∙doko Shillong songjinmani ja∙mano Tura songjinmaan mande jelbatgiparangoni biap damsa ong∙e wilwilao dongenggipa bang∙a chatro chatrirang UGC-NET porikkako sena dorgasto galaniko nikna man∙enga. Iani gisepo Tura-o North Eastern Hill University (NEHU) Campus dongani gimin adita Computer Lab-rangba gnang jeon Computer Based aro Optical Mark Recognition-ni porikkarangko sechakatna cholrang donga.
State aro National gadangni porikkarangko sechakani centre-rang A∙chik a∙songo dongjani a∙sel bang∙a neng∙nikanirangko chagrongna nangengani gimin, Tura-o North East State Level Eligibility Test (NESLET) ni porikakko sechakna centre-ko ra∙bagenchimode Garo Hills-ni manderangnasan ong∙aiggija North East ni pilak manderangnaba namen dakchakaniko on∙gen ine mol∙molan baksa GSMC dol didiangaha. Mikkangchi namgipa aro kragipa skigiparangko man∙anian joltangna aro North East-na bang∙a rasongko ra∙baani ong∙gen ineba aganangaha.
Bang∙a chatro chatrirangan tangka paisarangnigita neng∙nikanirangko man∙e indakgipa porikkarangko sena re∙angnagita cholko man∙rongja ine janapan baksana chadamberangna nambata aro altugipa cholrangko ra∙bachina porikka sechakram centre-ko ra∙bae on∙china bon∙kame didiangaha.
