NGH Kharkutta Block-ni ning·o ong·gipa Menadoba songo Jal Jeevan Mission (JJM) ni kamrangko ru·utatenganina aro gitcham maram cha∙gimin silni pipe-rangko chate on∙anina songdongengipa manderangni palo suk ong·gijaniko janapate songni Sordar Stephen Marak Kharkutta Sub-Division PHE-ni SDO-na chittiko seataha.
Sordar-ni chitiio janapatanigitade, Menadoba songo JJM project-ko kam ka·anio gitchamgipa aro maram cha·gimin pipe-rangko jakkale teke on·ako niknagita man·e baditaba changnade Kharkutta-ni Junior Engineer-na u·iataha ine parakataha. Indake changni chang aganani ja·manba gitcham pipe-rangko jakkale tekuenga ine u·iatangaha. Silni pipe-ko tekgipara komibeoba bilsi 15-na jakkalgimin ong∙ahani gimin maram cha∙aha aro ru·uta somoina baijawa ine aganangaha.
Ia silni pipe-rangko Chiringspong chiring-o check dam tarigiminoniko chiko salbae songni jatchio donggipa chi chimongchakramona watenga jekon songni manderang jakkaltokenga. Iani bidingo agangolpogriknaba jako ra∙enggipa JJM-ni contractor aro sub-contractor-ni mikkangrangko nikchipkujae songni manderang neng∙nikaniko aro suk ong·gijaniko u∙iatna man∙jae gitcham pipe-rangko ra·gale gital pipe-rangko teke on·china didiangaha.
Indake songni nokni manderangni neng∙nikaniko ta∙rake nirokatpachina aro ia gitcham pipe-rangko tekani bidingo jako ra∙enggipa contractor songni manderangna talataniko on·chinaba Menadoba-ni Sordar Stephen Marak, Kharkutta Sub-Division-ni SDO-na chitti sedoataha.
