West Garo Hills Tura Forestilla-ni chadambe saksa, Jonathan Sinkam M. Sangma Indian Institute of Technology (IIT) Bombay-o Aerospace Engineering-ko poraina seokako man∙aha. IIT Bombay-o porainagita, Jonathan A∙chikrangoni saksakamkam seokako man∙gipa ong∙aha.
Re∙anggipa somoioba Jonathan JEE Mains 2024-ni Session 1-ni Paper 2 (B-Planning) o National Topper ong·e chugipa gadango chu·soke niksenggipa ong·e A·chik jatna mikkim rasongko ra·baaha. Indakgipa chugipa gadango uni chu∙sokna man∙anichi India a∙songni nambatsranggipa Institute-o ua poraina cholko man∙angaha.
Ua Dr. Riksilchi M. Sangma aro Dr. Aelifter R. Marak-ni depante ong·a. Indake uni chu·sokanian A·chik chadambe sakantina bimchipe jotton ka·anichi chu·sokaniko aro jatna mikkim rasongko ra·bana didiani ong·angaha.
