WGH Dalu jolni MeECL department-ni kamko jako ra·e ka·enggipa SAI-Company Limited bijolirangko tik ong·e watjaenganina aro bijoli wataniko nirokgiparang chu·ongagita dongjanina Dalu Unit-ni AHAM aro GHSMC dolrang Dalu SAI company-ni Project Manager-na chitti on·an baksana Lineman-rangko chu·ongagita rakkichina didiataha.
NGO dolrangni chittio janapatanigitade, SAI Company Limited (electricity) ni bijoliko jakkalenggipa songrang Jekai Kherapara, Gasuapara, Phurakhasia, Rimrangpara aro Josipara songrangko nirok simsaknagita chu·ongagita Lineman-rang dongjani a·selo bijoli watanirang tik ong·jae songdongenggipa manderangna aro poraienggipa chatro chatrirang namen neng·nikaniko chagrongenga. Unbaksana Dalu jol namen dal·beani gimin janapgimin songrangko nirok simsakna da·o sak 32 Lineman-rangsan donge gimik biapchi re·e nirokna amchakjaenga ine janapataha.
Ia neng·nikanirangko olgrokatna aro bijoli wataniko namdapatna man·agita nanggipa ja·kurangko de·e chu·ongagita Lineman-rangko rakkichina Project Manager-ko mol·molataha.
