Ru·utgija somoirangna skang, Tura Chandmari-ni GBHSS football kal·chakramo District level Subroto Mukherjee Cup 2024 ko District Sports Office ong·atangaha. Ia susaaniko West Garo Hills-ni bilsi 15 ni ning·o ong·gipa skulrangni chadamberangna ong·ataha jeon bang·a skulrang bakko ra·angtokaha.
Ia Subroto Cup-ko ong·atanganio, Government Boys Higher Secondary School (GBHSS) ni me·asa dolrang chegipa ong·angaha. Subroto Cup-ko cheani ja·mano, joljol uamangni dol Shillong-chi kal·na seoka man·aha jeon final-ona sokdoange Ri-Bhoi baksa susae gnigipa biapko chebaaha. Ian Garo Hills-ni itihas-o bilsi 20 ni ja·mano, State Level Subroto Mukherjee Cup-gita dal·gipa kal·susaanio bakko ra·e final-ona sokdotaiani ong·a. GBHSS-ni me·asa dol skanggipa biapko man·jaoba Garo Hills-na mikkim rasongko ra·baaha.
State Level Subroto Mukherjee Cup 2024-ni final-ona sokdona GBHSS dol raken krenge kal·baaha. Uamang skanggipa kal·aniko SGH Baghmara baksa susae amataha. Apsandaken, South West Khasi Hills aro East Khasi Hills baksaba kal·e joljol chegipa ong·bae final-ona sokdoangaha. Final-o sirikgenchimoba, kal·anirang namen biltinggrik ong·aha aro GBHSS dolrang bilake kal·e namgipa sportsman-ni gunko dakmesokangaha.
Bilsi 20 ni ja·mano football-ni a·bao Garo Hills-na mikkim rasongko ra·bataianina, Tura Football League-ni I aro II Division-rangni final-ko kal·ani salo District Football Association (DFA), Tura uamangkoba joljol mande ra·aniko dakangjolaha. Ia mande ra·aniko man·gipa chadamberangni gisepo sak 6 kal·giparangko chong·motan Akimra G. Momin, Kandora Damrik S. Sangma, Marc R. Marak, Apaloi R. Marak, Bianchigrik R. Marak aro Achirach Sangma Shillong-o chubatgipa gadangrango kal·na seoka man·aha, aro training-rangko on·enggipao bak ra·anggen ine koborna parakataha.
