South West Garo Hills a·jani Jolgaongre songo saksa bilsi 26 ong·gipa, Meckenson Ch. Marak-ni depante Rikrak S. Sangma-ko ka·namgijagipa mongmarang kal·ake siataha. Sangma, ia a·selko an·tangni baganko naljoksona jinma tom·dakgipa mongmarangko rikale galmitingo chagrongaha aro chadrapa man·e janggi gimaataona sokaha. Songsalni manderang ong·a obostako bikan knae a·damona re·ange nion sigimin manggisikosan nikeaha.
Sing·sandiao agananigitade, jaksa mongmarang attam 7 aro 7:30 somoini gisepo songko ra·pakangmitingko manderang nike uamangni gamgimin biterangko champengsona arike galna jotton ka·aha. Sangma, obosta ong·na skang buring jolo donggipa uni a·ako o·roke rongtalatmitingo ia a·selko chagrongaha jeon uko jaksa mongmarangoni mangsa sijolpile kal·akaha. Manderang uni manggisiko a·damoni de·jitatna name jotton ka·beoba bil amsokjae janggi gimaaona sokaha.
