Adita u∙iataniko man∙e Sonibar, July 13 tariko South West Garo Hills ni Deputy of Superintendent of Police (HQ), Anti-Narcotics Task Force, Officer rang, Monabari OP aro Garobadha OGC dolrang Borkona jolo dingtang mancha am∙sandianiko dakange pekatgipa bosturangko badingenggipa mande sakgittamko rim∙na man∙angaha.
Ia rim∙a man∙gipa manderangara Gazarikandi, PO Radhamandabhat, PS Mankachar, Assam ni Mohumuddin Sk ni depante Mostafa Sheikh (bilsi 24), Tangaon PO Dhanoa, Assam ni Nurul Zamak Sk ni depante Meter Ali (bilsi 32) aro Kukurmara part-II, Radhamandabhat, PS Mankachar, Assam ni Amzad Ali ni depante Nur Abdin ong∙a.
Uamangoniko kg 1.06 mangni jregipa rong hajal 11 Methamphetamine tablet (Yaba), ge∙gittam mobile phone, bolgni bike aro churi ge∙sako man∙aha ine pulis dolrang parakataha. Rim·a man·gipa manderangko Narcotic Drugs & Psychotropic Substances (NDPS) Act ni ning·o pangchake Ampati Police Station-o mokordoma ka∙angaha ine u∙iatangaha.
Apsandake pekatgipa bosturangko bading chiwalgipa manderangko u∙igenchimode sepangbatgipa thanaona janapepachina pulisrang didianikoba dakangaha. U∙iattimgipa manderangni bimingrangko parakatgija donan baksana boksis rangko on∙anikoba dakangjolgen ine SWGH a∙jani pulis dolrang parakataha.
