District Football Association (DFA) Tura-ni ong·atenggipa, Tura Football League 2024 Division II ni semi final-ni match ge·gni da·alo kal·e matchotangaha. Skanggipa semi final kal·aniko, Dalu United baksa Rongbakgre SCC dolrang kal·angaha jeon dolgnian biltinggrike kal·e chu·gimik somoio goal gni prak man·e amgrikgijaniona sokaha.
Dalu United dolna skanggipa neng·takani somoi ong·na skang, Tangrak Sangma goal 1 ko chipe on·aha aro Rongbakgre dolna Lasting Sangma goal 1 ko chipe on·skaaha. Apsan daken gnigipa half-o Dalu United-na gnigipa goal-ko Tangsrang Sangma chipe on·aha jeon Rongbakgre SCC-naba Jecknowil Sangma chipe on·skaaha. Indake on·gimin somoio dolgnian amgrikjae penalty tingsusaanio Rongbakgre SCC goal 2 mangmangkosan chipna man·angaha jeon Dalu United goal 4 ko chipna man·skae cheangaha.
Gnigipa semi final-ko Sampalgre YC baksa Doreng SC kal·angskaaha jeon Doreng SC 3-2 goal chi chegipa ong·e final-ona sokdoangaha. Dolgnini gisepo rakgrikge kal·anio Sampalgre YC dolna Pinku Sangma aro Tangbo Sangma goalprak chipe on·aha. Indake ong·genchimoba Doreng SC-na Cherrybirt Marak goal 1 ko aro Nikku Marak goal 2 ko chipe on·e doltangko chegipa ong·atangaha.
