A∙dokni reservation policy-ko dingtangataniko nangnikjae United A-chik Youth Federation (UAYF), Hq. Rengdim aro All Khasi Hills Nokma Welfare Association, Rengdim Regional Unit, West Khasi Hills a·jaoni social activist-rang bakrime Expert Committee-ni Secretary L K. Diengdoh-na chitti see mol∙molataha.
Meghalaya a·doko 1972 bilsioni ja·rikbaenggipa, Khasi-Jaintia na 40% aro Garorangna 40% dake mongsonggipa jat gittamna a·kanggimin 80% sualenggipako dingtangatjachina aganangaha. De·jitanichi ba dingtangatanichi jat gittamni gisepo saksa sakgipinko gisik sa·dikatjachina status quo-ko ba chamgiminko apsandake jakkalbaengagita ja·rikangkuchina uamang u·iatangaha.
Reservation Policy-ko songsalo onbatgipa aro ja·manchakbatenggipa jatrang apsangrik tang·dochinasa suale chamahani gimin mande jelbatao mangmangsan pangchake dingtangatjachina ku·pattiangaha. Garo Hills-osan ong·gaigija Khasi Hills-ko niatoba, A·chikrangni songdonggipa biaprango nanggipa rika cho·ani, poraia skiani, dakchakani cholrang, aro gipin a·barango namen ja·manchakkue ia cholrangko da·onaba man·kujaenga. Iarango jang·nangpae skangsogiparang baksa susapana bilsokgijaniko janapate reservation policy-ko dingtangatna skang nipiltaichina uamang janapataha. Kamrangko apsangrik suale on·aniko parake mesokanigita, High Court-ni rai on·ao pangchake reservation roster system-ko jakkalchina social activist-rang aganangaha.
Iarang pilakko chagrongengani kosako reservation policy-ko expert committee dingtangatode, Garo jatrangna chamgipa 40% oniko ja·manchakbatenggipa Khasi Hills aro Jaintia Hills-ni songadam nokadamo dongenggipa Garorangna 20% ko chamatskachina aganataha. Apsandaken Khasi-Jaintia jatrangna chamgipaonikoba 20% ko chol man·gijagipa A·chikrangna on·a nangskagen ine uamang u·iataha.
Bristish-rangni chasongoni Khasi aro Jaintia Hills-ni bang·a biaprango lakh 2 mang ong·nasiple da·ona kingkingba A·chikrang songdongkuenga mongsongbate songadam jolrango dongenga. Khasi aro Jaintia Hills-o, ru·utbea bilsirangoni songdongbaoba uamangko District Selection Committee (DSC) ni kamrangna rimnapja ine parakataha. DSC-o kamrangna Garo Hills-o galna uamangko beng·anirang gnang, indake ong·engon Khasi-Jaintia Hills-o songdonggipa A·chikrang DSC-ni kamrangko ka·e cha·na chu·ongagita poraia skia dongoba rimnapa dongja ine parakataha.
Ia gamchatgipa chanchina nanggipa ku·pattianiko on·ate pilak janapatgimin a·selrangko reservation policy-ko nipilengon mikkango donchina aro pangnan ja·rikabengagita dakangkuaichina Expert Committee-ni Secretary L K. Diengdoh-o mol·molataha.
