Re·anggipa July 11 tariko, A·chik me·tra saksa aro Bangalore-oni re·bagipa uni ripeng baksa Jalukbari-oni Goalpara Rangjuli-ona re·angmiting somoio sak 5 denggu dakgiparang tourist gario rim·srukangaha. E T. Sangma aro uni ripeng R Prasanna Shillong-o adita somoirangko re·ate re·bapilmitingo, walni 9 bajimango ia a·selko chagrongangaha.
Denggu dakgiparang ua me·tra aro pante saksani re·na am·enggipa biapko sing·e, uamangba Rangjuli-oni km 25-30 mang chel·gipa Krishnai-ona re·na am·enga ine tol·mikaha. Me·tra sakgni, denggu dakgiparangni namgijagipa miksonganiko ma·sijae uamang baksa re·na ra·chakaha jeon gipin ga·dochapgiparangba dongani gimin sakprako gong 500 ko gamna aganaha. Me·trarangko rim·srukanggipa gari Swift Dezire (AS 01 QC 9447) ong·a.
Adita re·angani ja·mano, ia me·trarangko silchidarerangchi ka·mikkenate aro doke sate tangkarangko dabina a·bachengaha. A·chik me·tra an·tangko chang 30 na baten skoo dokaniko parakangaha. Uamangni dabienggipa gong lakh 50-ko on·jaode til·eke kal·akna aro sakgnikon so·ote galna ka·mikkenataha ine uamang aganangaha.
Assam-ni Baihata Chariali-o police dolrangni nirikkianiko dakengmitingo me·trarangko rim·srukangenggipa gari police-rangko chagronge Officer I/c ko salpake katangaha. Police dolrangni I/c adita be·eno saknaanirangko man·angaha. Police-rangni rikpangpilaniko nike uamang me·tra sakgniko Baihata Chariali rama a·samo dongalangaha. Me·tra sakgniko songni Nokma, Assam Kamrup Baihata Chariali police thana-ona rimange doneaha.
Police dolrangni ta·rake ja·ku de·anichi dosi donggipa sakgittamko salgipinon rim·na man·aha. Saksako Brahmaputra chibimao bilone katako man·aha aro sakgipinko Goalpara-oniko rim·na man·angaha. Mahari ma·drangrangni parakatanigitade E T. Sangma aro uni ripeng R Prasanna songtang Rangjuliona sokangaha ine u·ina man·aha.
