WGH Garobadha-ni wilwilao donggipa dam chet songrango wachi karini somoio salantio nangana re·ruraanio neng·nikaniko man·enganina ru·uta bilsirangonin dabienggipa hanging bridge-ko Ganol chibimako kasote on·china Tura-ni MP Saleng A. Sangma-na Garobadha Unit-ni A·chik Progressive Approach (APA) dol memorandum-ko on·angaha. Unbaksana songdongenggipa manderangni bading chiwalani a·bao tang·doatna aro re·ruraenggipa chatro chatrirang, sanna bannaniko ra·na rang·gitik nangani somoio mongsongbate wachi karini somoio altue re·rurana man·agita nirokatchina didiangaha.
Apsandaken Harigaon-oni Baghmara songjinmaona dakanggipa PWD ramarangko gital tarichina ba gitcham ramarangko taridape on·chinaba memorandam-ko on·angaha. Ia ramako dam sku songrang jeon sak 3,000 mang songdonggiparang nangana re·rurana jakkalgipa ong·a, ia ramagita gari gorarang re·nagita man·ja aro poraienggipa chatro chatrirangni skulrangona dakanggipa gipin ramarang dongjani a·sel namen neng·nikaniko man·enga ine APA dol janapataha.
Una agreba Chimisenggre Adhoc Secondary School-o gital skul nokko nangdapenganikoba janapataha jeon sak 100 mang chatro chatrirang poraienga. Indake kosako janapatgimin gimik nanganirangko nirokate nanggipa ja·kurangko de·e ta·rake kamrangko ka·china MP Saleng Sangma-ko Garobadha Unit-ni APA dolrang mol·molangaha.
