East Garo Hills, Simsanggre Division-ni ning·o bol bi·sarangko ge·pilna dal·dalgipa bolrangko den·peaniko A·chik Progressive Approach (APA) dolni President Francis Marak jinmani palo jegalataha. Indake ja·delgimin bolrangko den·peaniara ra·chakna man·gijagipa kam ong·a ine Marak koborna parakataha.
NGO ni bimango ua manderangni namgnina, uamangni jolo bol bi·sarangko ge·chakna ba tarichakna biap on·gimin dongaha ine agananirangkoba ua raken jegalataha. Unbaksana, Sericulture department-ni pang 30 dal·dalgipa bolrangko den·pena ge·etaniara bola wa·arangko ripingna dongimin niamrangko pe·ani ong·a ine APA dol parakataha.
Garo Hills-ni ong·telaigipa gamjinrangko nosto ka·aniko uamang raken champengchina didiate iani bidingo raka ja·kuko de·e sing·sandianiko dakchina aro bolrangko den·peaniko dontongatchina aganangaha. Unbaksana, mikkangchi ia kamrangko ka·jachinagita pangkamgipa ja·kuko de·angchina Simsanggre Division, Territorial, Divisional Forest Officer (DFO) o mol·molangaha.
