South Garo Hills Rompa Asim songo Jal Jeevan Mission (JJM) project-ko kam ka∙anirang tik ong·jaenganina saksa social activist Greneth Sangma songdongenggipa manderangni palo a·jani SP na chitti sedoataha.
Sangma-ni chittio janapatanigitade, Rompa Asim, Darit Asim aro Balkal Asim songrango Rompa Asim-ni Public Health Engineering (PHE) Department-ni ning∙o ong∙gipa JJM Project-ko kam ka·anirang tik ong·jan baksana kamrangko matchotgija galchipe donengani a·selo rongtalgipa ringani chirangna songdongenggipa manderang neng·nikaniko man·enga.
JJM Project-nigita rongtalgipa chiko songni manderangna sokatna nangani gisepon Rompa Asim aro uni wilwilao donggipa songrango chiko watani pipeline point-rangko chu∙onge tekjani a∙sel bang∙a nokrangona chiko sokatna man·jaenga ine Sangma janapataha. Unbaksana kam ka·e matchotani signboard ge∙gniko songaha jeon project ge·sakode kaman ka·gija donaha ine u·iatangaha.
Ia project-ni ning·o nokantiona ringani chiko man·a nanggipa damgni songara Darit Asim aro Balkal Asim ong·a jeon janapgimin damgni songni manderangna ringani chiko sale on·kuja ine u·inagita man·aha. Una agreba ia project-na chamatgimin tangkarangko kam ka·a grian bikotmanaha ine songni manderangni agananio ma·sinagita man·aha. Indake ong·engon ia songrangni Nokma kam ka·ani report-rango soi ka·kugijani gisepon jako ra·e kam ka·enggipa songni manderangna u·iatgija committee-ko songe tol·e soi ka·ani sakkiko on·e tangkarangko bikote ra·aha ineba janapataha.
Indakgipa kakketgijagipa kamrangni bidingo nanggipa ja·kurangko de·e sakkiko am·sandie mokordoma ka·china SP-ko didian baksana am·sandianio sakkirangko on·a jak on·e kang·kare kae kamko ka·na Sangma SP-ko mol·molataha. Ia gimik obosta ko niate JJM ni on∙gimin niamko jarikgijani ong∙ani gimin iani bidingo name dake am∙sandie niatpachina aro ia gimik matnanganiko sakki man∙ode case ka∙pachina Greneth M Sangma songni manderangni palo South Garo Hills ni Superintendent of Police na chitti see mol∙molangaha aro ja∙pang ja∙dilko sandi nina sakki sabut ko nangode on∙a ku∙rachakangaha.
