Gital seokako man·gipa Tura-ni MP Saleng Sangma-ko Resubelpara-o mande ra·pilaniko dakangani somoio, A·chik Progressive Approach (APA) dolrang Dainadubi degree college-ko rika cho·ani kamrangko a·bachengatchina memorandum-ko on·angaha. Uamangni memorandum-o janapatanigitade Dainadubi degree college-na ru·uta bilsirangonin dabigimin ong·a jekon batanggimin somoirango Minister ong·anggiparang pangchakani ro·ong mangmangkosan songe done da·onaba rika cho·anirangko a·bachengatkuja.
Dainadubi jolo degree college ge·saba dongkujani a·selo chel·a biaprangona re·e poraina nange korosrangni bidingo amjae poraianirangko dontongna nangronga. Unbaksana chubata gadango poraidapna chol ong·jae me·chikrang dambeoni bia ka·aona sokenga ine APA dolrang janapataha.
Indakgipa obostarangko champengna man·agita, Dainadubi jolni chu·gimik tang·doanina degree college-ko a·bachengate on·a man·genchimode chadamberang namgipa poraia skiani gadangko man·an baksana poraianiko dontonggipa chadamberangko chubata gadango poraina didiani ong·gen ine janapataha. Una agreba chadambe me·chikrang poraina cholko man·ode seng·gnang bia ka·anirangko champengna man·gen ineba APA dolrang MP Saleng Sangma-ko mol·molangaha.
