Tura-ni skanggipa Bishop, Most Rev. Emeritus George Mamalassery (1932-2024) jekon manderang ka∙sabee “The Engineer Bishop” aro “Bishop Mama” bimung minge okamrongako man·gipani janggina mijalo bon·kame bichakanirangko dakange Tura Cathedral gilja noko uni manggisiko gopangaha. Bishop-ni manggisiko St. Luke Church, Walbakgre-oni Sacred Heart Shrine, Chandmari-ona ra∙bae bon∙kame misa boli ka∙ange Tura Cathredal-ona ra·angaha.
Ia tom∙aniona Garo Hills ni bang∙a manderang, mongsongbate Catholic toromo bebe ra∙giparang mande ra∙aniko mesokna sokbatokaha. Ia rongtalgipa misa boliko Sacred Heart Shrine, Chandmari-o ka∙chakaniona Bishop, Archbishop, Deacon, Father, Sister aro Northeast a∙jarangni bang∙a toromo bebe ra∙giparangba re∙bae bakko ra∙angtokaha. Ia toromni dal·begipa ka·limani tom·aniona Chief Minister Conrad Sangma aro uni jikgipa, unbaksana gitcham Chief Minister Dr. Mukul Sangma Bishop-na bichakaniona re·bae bakrimeaha.
Chief Minister Conrad Sangma, uni agananio sianggipa Bishop Mamani Garo Hills-na dakanggipa nama kamrangna mittelpilangaha. Bishop-ni songsalna dangdike on·ani, poraia skiani aro sanna bannani a·bako tang·doatna mamingba man·pilskaaniko nanggija uni kam ka·anirangko Sangma janapangaha. Chief Minister uni pagipa sianggipa Purno A. Sangma-ko Bishop-ni skigipa aro ripenggita dake dilbaaniko janapange, Bishop-ni siangani Tura Diocese-na dal·a gimaani ong·a ine aganangaha.
Bishop ru·utbea salrangonin ka·sopo chi topani a·sel saknaa man·e Holy Cross hospital-o dongangaha jeon ua rang·sitna neng·nike bilsi 92 o jringjotna janggi galchotaha. Bishop George, Kurian aro Elizabeth Mamalassery ni bon·kamgipa depante ong·a jean Kerala Kalathoor-o atchiaha. Bishop-ni ma·gipa uni bilsi 12 ong·engmitingon a·gilsakko watangaha. Bishop, uni seminary-o poraianiko 1950-60 bilsirango matchotaha aro 1960 bilsini April 23 tariko ua kamal songako man·aha. Garo Hills o Assistant Parish Priest-ni kamko bilsi 10 na Tura, Dalu aro Baghmara-o dangdike on·angani ja·mano uko1970 bilsio Dalu ni Parish Priest songangaha. 1979 bilsini February 8 tariko uko Tura-ni skanggipa Bishop dake donataha aro March 18 tariko Don Bosco School kal·chakramo Bishop songangaha.
Uni Bishop ong·e bilsi 28 na Garo Hills-ni kona noksik biaprangona bida on·a, songsalna dakchakna aro sanna bannani a·bao inditan dangdike on·angaha. Bishop Mamalassery, Garo Hills ni ge 57 L.P school, 35 M.E School, 16 Sec. School, 2 H.Sec School, 24 girls’ hostel, 23 boy’s hostel rangna dakchakanioba bak donganga. Salestian Don Bosco rangkoba ua 1988 bilsio Don Bosco College Tura-ko bikotchina okamataha. Iasan ong·aigija a·a chiarangko on·e Jesuits dolrangkoba ua Williamnagar o college kulichina okamataha.
Unbaksana ua Monfort Brothers koba be·en bimangni aro gisiknigita bilgrigiparangna Monfort Centre ko kulichina didiataha. Uni ning·ao nirokanichi Bakdil da·o dal·begipa NGO ong·aha jean Garo Hills ni namgnina kamrangko ka·angenga. Sorkari baksa melie ua skanggipa changna poraianiko dontonggipa me·chikrangna dongchakani gnang KGBV school-ko Jengjalo kulidilaha.
Sanna bannani a·damoba ua kangal cholgrirangna ka·sae songadamrango ge 20 na bate dispensary rangko kuliaha aro mongsongbate 150 palang donggipa Holy Cross hospital-koba a·bachengataha. Ua nurse-rangko tang·doatna uamangko skinagita bang·a dakchakaniko on·angaha aro bu·chuma budeparangna dongchakani nokrangkoba tarie on·angaha. Bishop Mamalassery-na 2018 bilsio Padma Award-ko aro Pa Togan Nengminja Award-ko Meghalaya sorkari uni Garo Hills-na dangdike on·anina mande ra·e on·angaha.
