Nengkra Sub Unit-ni AHAM dolrang Nengkra Agalgre-o songdongenggipa manderangni namgnina gitalgipa dolongko ta·rake tarie on·china Chief Minister Conrad Sangma-na Memorandum-ko on·angaha.
Dolong dongjani a·selo salantio re·ruraenggipa skul re·gipa chatro chatrirang aro dingtang dingtang nanganirangna songni manderang an·tangtangni janggina kenbeani ong·genchimoba maming cholrang dongjae ia Rongtam chibimako batsote re·na nangao ga·akenga ine AHAM dolrang janapataha.
Ia dolongko riknagita nanggipa tangka paisarangko chamate ta·rake nirokate kamrangko ka·china AHAM dolrang mol·molanga. Ia project-ko ra·bae on·anichi chatro chatrirangna, Rongtam chisamo songdongenggipa manderangna wachi karini somoio kenbegnigipa a·selrangoniko naljoke rakkina man·agita gitalgipa dolongko ta·rake tarie on·china Nengkra Sub Unit-ni President Silchi Sangma CM-ko mol·molataha.
