Re·anggipa July 2 tariko Drugs badinggiparang baksa bilsi 36 ong·gipa Niksamseng Ch. Marak-ko pulisrang rim·e maming court-ni rai on·a grigipa NLF Rehab Centre Nayapara Goalpara-o don·ataha ine nokdangni manderangna koborko on·ataha. Nokdangni manderang ia koborrangko man·soe uko grongnagita re·angon nokni manderangko darangkoba grongna on·gija bilsi 4 ong·gipa depantegipakosan grongna on·e paningsa sakgnini kalgrikako video ka·giminko mesoke name dongenga ine agane nokni manderangoniko Rehab Centre-o gamani tangka gong hajal 20 ko ra·rikaha ine parakataha.
Indake salgnini ja·mano July 4 tariko rang·san uni siani koborko nokdangni manderangna on·ataniko knasoe jagokpilaha ine u·iataha. Rehab Centre-oni uamangna koborko on·atanigitade ua an·tangko ka·dingdee ba pakmao totkingkinge siaha ine koborko man·soaha. Nokdangni manderang kae sianiko bebe ra·na amjae uni manggisiko name niahaon kae siani maming chinko nikjan baksana uko silchi darerangchi su·protani aro mikkang ma·tani dagi, rotrangchi dokani chinrangko nikna man·aha ine u·ina man·angskaaha. Unbaksana manggisiko porikka ra·e nianioba ua an·tangko kae sija ine parakataha.
Pilak kamrangko nikgrikanio uko doke siataha ine chanchichipe Goalpara-ni Deputy Commissioner-ko gronge, Goalpara Sadar Police Station-o mokordomako ka·ange kakket bichalko on·china dabiangjolaha. Nokdangni manderang baksa adita NGO-rangni dabianiko man·e Goalpara-ni DC, NLF Rehab Centre-oniko jako donga ine chanchichipgipa manderangko nirok sandianiko dakchina ge·etangaha. Rehab Centre-ona re·ange am·sandianirangko dakon uamang maming sorkarini rai on·gipa lekka pancha gri ia Centre-ko chalaienga aro Niksamseng Marak-ko uamangan so·ote siataha ine ma·sinagita man·aha. Am·sandiarangko dake kakketgipa sakkirangko man·e saksni dosi dakgiparangko rim·aha aro sak 2 kate dong·enggipako sandiangkuenga ine pulis dolrang parakataha.
