West Garo Hills Selsella jolni Silkata, Haripur aro Namabila songrango mikka jimbee waani a·selo chi dal·e nisiata man·gipa biaprangko Chief Minister Conrad Sangma aro Selsella-ni MLA Arbinstone B. Marak nirokangaha.
Ia a·selo ga·akgipa nokdangni manderangko gronge uamangna cha·a ringani, nokchakani biaprangko tarie on·china aro pilak nanggipa kamrangko ka·e nirokatchina District Administration-ko CM ge·etangaha.
Ia bilsini wachi kario Selsella jolo chi dal·anichi aditan neng·nikanirangko man·angaha. Re·anggipa jarangona bateba ia chango chi dal·bataniko aro bang·a nisiatanirangko ua jolo songdongenggipa manderang chagrongangna nangaha.
